НАУРЫЗ МЕЙРАМЫ ҚҰТТЫ БОЛСЫН!!! 22-ші Наурыз – шығыс халықтарының ежелден келе жатқан мейрамы. Ол ерте заманнан бері табиғат қыстан шығып, көктемге өткен кезде, жер ана жайнап, дала көк шөп пен гүлге малынып, жан-жануарлар түрленіп, төлдеп жатқанда кең тойланатын Жаңа жыл мерекесі. Бұл мереке кезінде адамдар бір-бірімен көрісіп, «ескі жыл есірке, жаңа жыл жарылқа» деп, «ұлыс оң болсын, ақ мол болсын» деп тілектер айтады. Жақын адамдар, дос-жолдастар бір-бірінің үйлеріне барып көріседі. Наурызда арнайы Наурыз көже 7 түрлі дәмнен дайындалады, одан үй-іші, көрісіп келушілер ауыз тиеді. Наурыз кезінде ренжісіп қалған адамдар бұрынғы реніштерін ұмытып, қайтадан табысады. Бұл күні барлық реніш, өкпе ұмытылып кешірілуі тиіс. Наурыз мейрамы кейінгі жылдары біздің Қазақстанда, барлық облыстарда кеңінен тойланып үлкен ерекшелікпен аталып өтіледі. Әр елді мекенде көптеген жерде арнайы ұлттық нәшінде безендірілген киіз үйлер тігіліп, адамдар ұлттық киім киіп шығады. Арнайы құрылған алаңдарда әншілер мен бишілердің, шығармашылық ұжымдардың концерттері, театрлық қөріністер қойылады. Орталықта наурыз айтыс өтеді. Тағы сол сияқты көптеген шаралар ұйымдастырылады. Осы мейрамға барлығымыз түгелдей қатысып, кеңінен осы мейрамды тойлайық ағайын! Сізді алдымызда келе жатқан Ұлыстың ұлы күні - Наурыз мейрамымен құттықтаймын! Ұлыс оң болсын, ақ мол болсын! Келген жылдың жақсылығы көп болсын, әр үйге бақ-береке, амандық пен табыс әкеліп, баянды болуды тілеймін! Қазақ елінде бейбітшілік пен молшылық болсын, Жаңа жыл халыққа көл-көсір қуаныш пен бақыт әкелсін, қазақ тілінің мәртебесі арта берсін!
Сізге шын жүректен, Болат Жұмаділдаұлы, 2009 жыл.
|